20190903. A arte non só se atopa nos museos e con esa idea chega aos pobrenses xardíns de Valle-Inclán a cuarta edición do Olladas na Rúa. Esta cita reunirá o sábado 7 as obras dun total de 33 artistas, dos cales 20 son pintores e 13 escultores. Un evento que foi crecendo ano tras ano, pois na primeira convocatoria contouse con 22 participantes, mentres que no 2018 xa foron 28. A pesar de que as obras disporán dun cartel onde se indique o título, autor e técnica empregada, algúns dos creadores estarán nas inmediacións dispostos a explicar a quen o requira os detalles da súa peza. Ademais, como novidade repartiranse ao redor de 400 folletos con prólogo de Eme Cartea, da A. C. Barbantia. Así o deron a coñecer esta mañá no Consistorio da Pobra do Caramiñal a concelleira de Cultura, Patricia Lojo, e a técnico da mesma área, Fita Sanisidro.
A edil manifestou que con esta proposta queren “que a arte tome estes xardíns e saia á rúa”, pois chega a un amplo público e “gusta moitísimo.” Deste xeito, a vila converterase por un día “nun gran museo” ao aire libre e posibilitará a visibilidade dos autores a unha maior escala.
Pola súa parte, a técnica de Cultura indicou que se representarán diversas técnicas da pintura contando con “óleo, gravados, debuxo, acuarelas, collages, acrílico…”, así como da escultura a través de distintos materiais coma “pedra de aquí da Barbanza, madeira -tanto de castiñeiro coma de buxo, de chopo, policromada-, outras pezas van en aceiro inoxidable, outros con materiais de refugallo, algunhas con bronce.” Así mesmo, precisou que non so participarán artistas da comarca, senón tamén da provincia de Pontevedra.
