A semana pasada presentouse en Noia unha iniciativa directamente encamiñada a favorecer os hábitos saudábeis na contorna urbana da vila. Trátase da nova edición de Noia Actívase, un programa de actividades impulsado pola Concellería de Deportes que inclúe todo tipo de propostas para estes meses de verán: GAP, pilates, zumba, zumba kids, body jump, body jump kids, mantemento e ioga. As actividades serán impartidas por diferentes profesionais.
Segundo fixo saber a área de Deportes de Noia, a participación é gratuíta e non é preciso inscrición previa. “Calquera pode chegar e participar, serán actividades de balde, abertas, e celebraranse en espazos libres e amplos”, sinalou a concelleira de Deportes do Concello de Noia, Laura Salgado García.
Noia Actívase desenvolverase entre este luns 5 de xullo e o 3 de setembro, en horario de 10:30 a 11:30 e de 21:30-22:30, agás a clase de zumba dos venres que será de 11:00-12:00.
