Dous motoristas tiveron que se trasladados, esta mañá, despois de sufrir senllas caídas, nos concellos de Poio e de Porto do Son.
Con escasa media hora de diferencia, os operadores do Centro Integrado de Atención ás Emerxencias (CIAE-112 Galicia) recibiron as chamadas de aviso de persoas particulares que presenciaran os accidentes.
Por un lado, ás 10.15 horas, producíase a caída dun motorista na estrada comarcal PO-308 e a persoa implicada semellaba necesitar asistencia médica. Así, desde o 112 comunicáronselle os datos aos servizos médicos, á Garda Civil de Tráfico e á Policía Local. Ademais, tamén tiveron constancia os Bombeiros de Pontevedra, os membros do GES de Sanxenxo e Protección Civil de Poio.
Ao remate da intervención, o GES de Sanxenxo confirmou que o motorista foi trasladado polo persoal sanitario ao centro médico de referencia.
PORTO DO SON
Por outro lado, do sinistro acontecido no concello coruñés tivo constancia o 112, ás once menos dez da mañá. Sobre este mesmo, unha testemuña indicaba que acababa de ocorrer na estrada que une a localidade sonense con Ribeira.
Así, facilitáronselle os datos aos axentes da Garda Civil de Tráfico e da Policía Local, aos Bombeiros de Ribeira, ao GES de Noia, a Protección Civil de Porto do Son e ao 061.
Foron, finalmente, os membros da Agrupación de Voluntarios do concello os que lle indicaron ao 112 Galicia que o motorista tivo que ser trasladado ao centro de saúde.
