20190902 Agora que vén de comezar setembro, dificilmente vaise poder repetir unha impresionante escenografía colectiva como a que vemos na imaxe, obtida a semana pasada no Faro de Corrubedo por Fran Domínguez, xusto ao comezo da noitiña, co sol xa acabado de afundirse por tras do horizonte e con visitantes (sobre todo) e residentes (algo menos) tentando buscar o mellor encadre e os mellores efectos de luz en cadansúas cámaras orientadas ao solpor.
E dicimos “dificilmente” porque co comezo deste último mes do verán, a comarca volve recobrar en parte, como cada ano por estas datas un pouco tristeiras, os índices de poboación previos á chegada da época estival: os pisos de aluguer vacacional baléiranse, as terrazas dos bares e restaurantes vólvense máis silandeiras e nas praias máis concorridas o problema para chantar o parasol e a toalla deixou de ser un problema. E o Faro de Corrubedo, á espera de que avance a tramitación para convertelo en espazo hostaleiro-turístico, recobra unha vez máis (temporalmente) a tranquilidade.
