O Partido Barbanza Independente (PBBI) vén de achegar unha moción relativa ao Parque Periurbano de San Roque, en Ribeira. A agrupación recoñece ter avaliado recentemente as estruturas e elementos do parque, e, segundo fixo saber, “atópanse nun total abandono”, malia “ser o cinto verde por excelencia de Ribeira”, engadiu.
Os integrantes do PBBI tamén critican na moción a “falta duns accesos peonís bos e seguros á contorna a disposición de todos os veciños e visitantes que queiran acceder dende Frións, Aguiño ou mesmo dende a avenida de Ferrol”. Segundo fan saber, “é preciso construír sendas peonís para poder acceder desde Ribeira e parroquias a este enclave”. Tamén critican o estado no que se atopan as pasarelas, os bancos e os paneis, e lembran que é preciso rozar a maleza para “evitar riscos e mala imaxe”.
Segundo explican, “unha zona verde e ben coidada é esencial nas nosas vidas, no noso día a día. Durante a peor fase da COVID-19, o peche de parques serviunos para valorar a necesidade de zonas verdes. A ausencia de parques e de contornas naturais de lecer provoca maiores desigualdades sociais, como se demostrou na pandemia. Tampouco se trata de falar de máis ou menos zonas verdes, senón que nós imos máis aló e preguntámonos se o que temos coidámolo e mantemos”. Neste senso, o PBBI pregunta ao Executivo local se “é coñecedor de que existe unha normativa europea sobre sanidade vexetal para a xestión integrada de pragas de obrigado cumprimento en espazos públicos”. E engaden: “Nos nosos xardíns e nas nosas casas coidamos e conservamos as nosas plantas, polo que pedimos que se faga o mesmo nos nosos parques”.
O PBBI tamén solicita que “se cree un rexistro das árbores e arbustos dos parques e rúas de Ribeira”.
En virtude de todo o devandito, a agrupación fai as seguintes peticións específicas:
1- Instar ao Concello de Ribeira a que proceda aos tratamentos periódicos de mantemento e limpeza do Parque Periurbano de San Roque.
2- Que o Concello se comprometa a elaborar un plan de tratamento de pragas, procedendo a aplicar os produtos fitosanitarios adecuados e que respecten o medio ambiente.
3- Que o Concello de Ribeira elabore unha listaxe ou unha relación das árbores e arbustos existentes nos espazos verdes e en vías públicas.
4- Instar ao Concello de Ribeira a buscar as alianzas entre os sectores públicos e privados para o mantemento e conservación das zonas verdes do municipio e, máis en concreto, o Parque de San Roque.
