Alumnado de sexto de Primaria do Colexio de Artes vén de desenvolver como actividade lectiva unha campaña ambiental destinada a loitar contra un dos grandes desafíos do noso tempo: o lixo no mar. A campaña O ecosistema mariño precisa da túa axuda, materializada en colaboración co Concello de Ribeira, inclúe unha serie de accións de sensibilización nas praias.
Así, os rapaces e rapazas (unha ducia en total) confeccionaron catro carteis nos que se convida a quen os lea a non deixar residuos nos areais e a recoller os refugallos que se observen. O primeiro deles acaba de ser colocado na praia de Coroso (cos nenos e nenas estivo a concelleira de Educación Juana Brión) en tanto que os outros tres irán destinados á Ladeira, O Vilar e A Corna.
Tamén está prevista a colocación en Coroso dun recolector de residuos plásticos en forma de nasa dentro desta iniciativa promovida polo colexio de Artes.
