Os socialistas de Ribeira, a través do seu concelleiro José Manuel Suárez-Puerta Sirgado, presentaron unha proposta á Corporación municipal relativa á necesidade de achegar alternativas no municipio para os vehículos electrificados, híbridos ou de gas, cuxa presenza, recordan, “medrou no territorio estatal, en 2020, nun 146,5% con respecto ao ano anterior, segundo datos proporcionados por ANFAC”.
O PSOE de Ribeira opina que malia as boas cifras de mercado, o despregue de puntos de recarga para coches eléctricos non está á altura das expectativas, crecendo só un 58 % nese mesmo período de tempo. “O número total supera xa os máis de 203.000 cargadores en toda Europa, pero poderían non ser suficientes para dar abasto a un parque que aumenta a un ritmo moito maior”, explican, poñendo o foco na necesidade de situar a Ribeira na vangarda deste proceso. En palabras dos socialistas locais, “a carencia de suficientes cargadores para vehículos eléctricos é un feito particularmente visíbel en España en xeral e en Galicia en particular, sendo o caso de Ribeira aínda máis evidente”, xa que, segundo recordan, “o municipio non está dotado de ningún punto público no que poder realizar as operacións de recarga”, polo que se estarían poñendo importantes trabas á mobilidade sustentábel de residentes e, tamén, e visitantes e turistas.
Por todo o devandito, propoñen o seguinte: “Que o Concello de Ribeira proceda á instalación de puntos de recarga de vehículos eléctricos, de potencia suficiente para a realización dunha carga rápida nos lugares de maior afluencia de visitantes, para que nestes poidan recargar os vehículos e aumentar en consecuencia a súa autonomía”.
Os socialistas achegan unha lista de puntos de recarga cos seguintes emprazamentos:
a.- Praia da Corna
b.- Porto de Palmeira
c.- Estacionamento a carón do Camping de Coroso
d.- Estacionamento xunto ao Polideportivo de Coroso
e.- Paseo das Carolinas
f.- Avda. do Malecón
g.- Praia de Castiñeiras
h.- Porto de Aguiño
i.- Porto de Corrubedo, limitando o acceso rodado en tempada estival aos vehículos dotados do adhesivo que certifica a súa eficacia Enerxética e necesidade de acceso aos puntos de recarga.
