A Mancomunidade Barbanza-Arousa puxo en marcha este xoves 27 de maio á campaña Conserva A Orixe, e fíxoo contando coa participación de conserveiras, establecementos de hostalaría e adegas da Indicación Xeográfica Protexida (IGP) Terras de Barbanza e Iria. O obxectivo desta promoción é “o apoio ao turismo a través da posta en valor dos produtos gastronómicos do territorio”.
No arrinque da campaña fíxose saber que nela participarán uns 40 establecementos de hostalaría da nosa comarca, nos que se poderán degustar conservas gourmet de Barbanza Arousa acompañadas dos viños das adegas do IGP Terras do Barbanza e Iria. Segundo fixo saber a xerente da Mancomunidade Barbanza Arousa (integrada polos concellos de Ribeira, A Pobra, Boiro e Rianxo), “houbo unha alta participación e unha boa resposta do sector turístico”.
Tamén fixo saber que as degustacións terán premios directos a través de rascas. Algúns destes agasallos son un aloxamento nunha casa rural, un bautismo de mergullo, un paseo en barco polo noso litoral ou unha posta de sol desde a Ría de Arousa.
Adolfo Muiños, presidente da Mancomunidade Barbanza Arousa e alcalde de Rianxo destacou “a alta calidade dos produtos gastronómicos do territorio e o gran recoñecemento a nivel mundial da industria conserveira, ademais da excelencia dos establecementos do territorio”.
