20190826 Quen dixo que as bibliotecas non son para o verán, non pasou polo Barbanza. Un exemplo de actividade e dinamización lectora en pleno mes de agosto é a Biblioteca Municipal de Ribeira, que conmemorou este mes unha serie de cousas relacionadas coa literatura e o recomendábel hábito de ler, mesmo (ou sobre todo) en época estival. Por exemplo o aniversario dun dos grandes das nosas letras, Xosé Luís Méndez Ferrín, de quen se vén de reeditar unha das súas obras máis destacadas, o poemario Con pólvora e magnolias, que xa está a disposición dos lectores de Ribeira, como tamén o está En las orillas de Sar, de Rosalía de Castro, que sae de novo á luz nun coidado volume, ou a obra poética reunida de Xela Arias, poeta, tradutora e profesora galega, tristemente falecida á idade de 41 anos e, malia a súa breve traxectoria vital, responsábel dalgúns dos poemas máis célebres da nosa literatura recente, como os reunidos en Tigres coma cabalos ou Darío a diario.
A biblioteca de Ribeira tamén enfiou “o devalar de agosto” cunha contribución de importantes obras de coñecemento, logo de varias propostas semanas de ficción literaria. Entre as novidades desta (xa) case recta final do verán atópanse monografías sobre socioloxía e feminismo, historia do cinema e da fotografía de Galicia, matemáticas, climatoloxía, plantas medicinais, robótica ou literatura galega. As novidades inclúen obras biográficas sobre Castelao, Rafael Dieste, Xerardo Fernández Albor ou María Xosé Queizán.
