Noia acolleu a presentación das vantaxosas opcións de mobilidade da tarxeta Xente Nova

Os alcaldes de Noia, Outes, Lousame e Porto do Son (Santiago Freire, Manuel González, Teresa Villaverde e Luis Oujo, respectivamente), participaron o pasado 21 de maio na presentación das importantes vantaxes de mobilidade que pon en xogo, a partir de xa, a tarxeta Xente Nova. Trátase, en concreto, dunha iniciativa do Goberno galego para estender os beneficios do dito cartón á mocidade menor de 21 de anos, co fin de que poidan facer os seus desprazamentos formativos de balde (poderán realizar até 60 viaxes mensuais gratuítas nas máis de 3.100 liñas que xestiona o Goberno galego). Á presentación, que foi na Estación de Autobuses de Noia, acudiron o presidente da Xunta, Alberto Núñez Feijóo, e as conselleiras de Infraestruturas e Política Social, Ethel Vázquez e Fabiola García.

A iniciativa

A Xunta anunciou esta primavera a extensión da gratuidade no transporte público aos menores de 21 anos de toda Galicia. Esta medida fíxose efectiva, finalmente, o pasado 21 de maio, a través do emprego da tarxeta Xente Nova, un dispositivo que até o de agora podía empregar nas áreas de transporte metropolitano, na provincia de Ourense e en 13 concellos da área de Pontevedra, e que agora amplía o seu radio de acción a toda a xeografía galega. O obxectivo: permitir que todas as persoas menores de 21 anos viaxen de balde no autobús da Xunta, ademais de no barco no caso da ría de Vigo e no ferrocarril de vía estreita na área de Ferrol. Toda a información requirida sobre esta iniciativa, na web www.bus.gal.

A Xunta fai saber que esta tarxeta pode adquirirse en calquera das 213 oficinas de Abanca habilitadas nas catro provincias.

Para empezar a empregala cómpre que as persoas usuarias carguen a tarxeta cun saldo inicial co que se aboarán as viaxes e posteriormente será reintegrado no dispositivo.

Na páxina web www.bus.gal pode ampliarse a información relativa a este dispositivo e as vantaxes que leva asociadas, así como o listado de todas as sucursais habilitadas para a súa expedición e os servizos de transporte existentes en cada concello, cos correspondentes horarios e rutas.

Máis de 80.500 mozas/os xa beneficiadas/os

Na actualidade, máis de 80.500 mozos menores de 21 anos xa viaxan de balde nos autobuses interurbanos da Xunta a través do emprego desta tarxeta.

A área da Coruña alberga o maior número de dispositivos expedidos, contabilizándose case 22.850; seguida da de Vigo, con case 17.225 tarxetas distribuídas; e Santiago, con preto de 12.150. Na área de Ferrol, máis de 9.600 rapaces dispoñen desta tarxeta; na de Pontevedra, máis de 5.200; e na de Ourense, máis de 2.700.

O ano 2020, malia a crise sanitaria, rexistrou o maior incremento nas tarxetas expedidas desde a súa activación en 2016, emitíndose máis de 21.000 dispositivos.

Desde a implantación desta medida, realizáronse máis de 8 millóns de desprazamentos de balde, cun investimento por parte da Xunta que se sitúa en preto dos 8 M€.

A tarxeta permite realizar cada mes ata 60 viaxes interurbanas gratuítas. A súa recarga pode efectuarse nos caixeiros de Abanca ou nas oficinas habilitadas para expedila e tamén de xeito telemático mediante a banca móbil ou electrónica da citada entidade.

A Consellería de Infraestruturas e Mobilidade está a traballar actualmente para que os usuarios poidan levar esta tarxeta directamente no móbil e facer as recargas sen necesidade dun caixeiro.

Vertente social

A tarxeta Xente Nova é unha iniciativa social de fomento do transporte público que a Xunta puxo en marcha no ano 2016 nas áreas de transporte metropolitano para permitir a gratuidade no transporte público a menores de 19 anos. Logo estendeuse a cobertura ata os menores de 21 anos e desde xuño do ano pasado, o Executivo autonómico activou este incentivo na provincia de Ourense e en 13 concellos da área de Pontevedra.

Esta iniciativa do Goberno galego, enmarcada no Plan de Transporte Público de Galicia, ten como obxectivos “contribuír á economía das familias e facilitar o acceso dos mozos a servizos básicos como a educación, especialmente a non obrigatoria, ao tempo que se fomenta o uso do transporte público e, polo tanto, unha mobilidade máis sustentábel e limpa entre os máis novos”.

Segundo informou estes días a Xunta, “o uso da tarxeta está a ter impacto nos petos das familias”, pois, por exemplo unha moza de Verín que estude na cidade de Ourense está a viaxar gratis todo o curso, fronte á situación anterior na que debía abonar un prezo por viaxe de 4,55 €, uns 200€ ao mes. Así, actualmente esa moza benefíciase dun aforro de case 1.800 euros nos 9 meses lectivos.

Publicación no Diario Oficial de Galicia

O pasado 20 de maio publicouse no DOG a resolución pola que se estende ao conxunto da comunidade a gratuidade no transporte público aos menores de 21 anos coa utilización de Xente Nova. Na seguinte ligazón ao DOG pode ampliarse a información relativa a esta resolución: http://xurl.es/q2y00