A asociación comarcal Amicos, centrada en favorecer a máxima inclusión das persoas con diversidades cognitivas dos nosos concellos, celebrou este 21 de maio a segunda edición das súas Xornadas de Emprego Personalizado.
O obxectivo foi compartir recursos e coñecemento para axudar a que as persoas en risco de exclusión teñan a oportunidade de ter un emprego adaptado a súa medida.
A xornada celebrouse por streaming e contou coa presenza (entre outras e outros) de Emilio Pérez Outeiral, concelleiro de Benestar Cidadán de Ribeira, Marcos Fajardo Outeiral, concelleiro de Deporte e Xuventude de Boiro, José Ramón Esperante, técnico de Emprego de Mazaricos, Silvia Muñoz, técnica de Plena Inclusión Madrid, e Francisco José Rey González, membro de FADEMGA Plena Inclusión Galicia.
A cita veu da man da Área de Emprego da Asociación Amicos. Celebrouse de maneira presencial e en streaming.
Un dos puntos no que se puxo o punto foi no programa Plena Inclusión, iniciativa pioneira que pon en valor o potencial e os talentos de tódalas persoas con discapacidade, para poder facilitar a súa incorporación ó mercado laboral. Faino principalmente a través de Emprego Agora, do que é beneficiaria a asociación Amicos, precisamente. Na xornada deste 21 de maio fíxose saber que a entidade da nosa comarca ten a día de hoxe 11 persoas participando no programa, das cales seis son mulleres e cinco son homes. Amais, veñen de diferentes concellos da contorna: Noia, Ribeira, Mazaricos, Boiro, Xeve (Pontevedra), Ames e Oroso. A sesión deste venres contou coa presenza dun dos participantes, Vicente Fernándes, que contou a súa propia experiencia, en que fase do programa se atopa e que acción está levando a cabo.
Tamén interveu no encontro unha empresa participante no programa, a empresa Troquel GameS, cuxo director executivo, Ramón González, que traballa con Amicos para acadar talento laboral para a súa actividade cotiá.
Dende Plena Inclusión España, Silvia Muñoz, coordinadora dos proxectos de emprego personalizado, falou da aposta que dende a súa entidade se está a facer para conseguir a incorporación ao mercado laboral das persoas con discapacidade: “Poñemos o foco na exploración do talento e recursos da persoa e na negociación personalizada co empregador”.
