O alcalde de Boiro, José Ramón Romero, e o concelleiro de Urbanismo e Obras, Luis Ruiz, visitaron este 14 de abril as obras da nosa sede do Club de Remo de Cabo de Cruz, impulsadas polo Concello. Na visita puideron coñecer o estado de execución das obras acompañados do arquitecto municipal, Emilio Piña. Constataron que os traballos “avanzan segundo o previsto”.
Neste momento, explicaron, estase a traballar na preparación dos illamentos do chan e recrecidos de cemento para botar o piso do primeiro andar. Engadiron que en breve comezarase coa colocación dos falsos teitos e vidros das xanelas para logo realizar os acabados finais como son as baldosas ou o pavimento técnico do ximnasio. Tamén lembraron que o Concello atópase en contacto constante co Club de Remo e a empresa adxudicataria para “que o resultado final da obra se adapte ás necesidades dos remeiros”.
Entre as melloras no proxecto están o redeseño do foso cun deseño específico de bancadas que se axustan ás condicións reais da traíña. Feitas e consensuadas as modificacións, o prazo de execución das obras está previsto que remate nuns 3-4 meses.
