Na mañá deste 18 de marzo o alcalde de Boiro, José Ramón Romero, e o concelleiro de Turismo, Raúl Treus, presentaron os proxectos nos que está mergullado o Concello neste intre de cara á promoción turística do municipio. Tamén avanzaron detalles sobre sobre a presenza de Boiro nas redes sociais, que se incrementan grazas á estrea nelas da área de Turismo.
Segundo fixeron saber, o departamento que dirixe Raúl Treus ten entre mans diversas ideas para amosar e difundir “un turismo que quere descubrir eses lugares do municipio menos coñecidos”. Para iso, o Concello vén de crear os perfís sociais en Facebook e Instagram do devandito departamento e facer a difusión, non só a visitantes senón tamén aos veciños e veciñas. “O obxectivo destes perfís nas redes sociais é ofrecer á veciñanza unha canle de promoción que a día de hoxe é básica e necesaria a través de internet e as redes sociais”, afirmou o concelleiro Raúl Treus.
Asemade, o departamento de Turismo desvelou os proxectos que o departamento está a programar de cara ao ano 2021, encamiñados a dar a coñecer os recursos turísticos dos que dispón o municipio e nos que se leva actuando moito tempo para conservalos. Un exemplo destes proxectos é Boiro facendo camiño, un conxunto de roteiros turísticos que se presentaron a semana pasada e que xa están dispoñíbeis na web turística de Boiro.
