O Centro Cultural Lustres Rivas de Ribeira acolleu o acto de inauguración dunha nova exposición: “Flores Silvestres de Galicia”, de Constantino González Pérez, composta por unha vintena de obras compostas, como o seu propio nome indica, por distintas especies tales como o toxo, os pampullos ou os croques.
Cumprindo os protocolos anticovid, o acto contou coas intervencións
da concelleira de Cultura, María Sampedro, e do propio autor tras as
palabras introdutorias do técnico municipal Unai González.
Sampedro agradeceu a doazón efectuada polo pintor dunha das súas
obras aos fondos do Concello e salientou o seu carácter didáctico.
A mostra permanecerá ata o 3 de abril. Poderá ser visitada de luns a
venres de 10 a 14 e de 19 a 21 horas e os sábados de 11 a 14 horas.
Constantino González Pérez nace en Cenlle (Ourense) en 1950.
Aprende a debuxar aos 11 anos na Escola de Artes e Oficios de Vigo.
Aos 17 anos emigra a Venezuela onde compaxina o seu traballo cos
estudos de pintura e ilustración artística na Academia de Belas Artes
de Caracas, onde coñece ademais a pintores de gran renome. Ao
longo da súa traxectoria cultiva distintos estilos pero,finalmente,
inclínase polo impresionismo no óleo sobre lenzo cuns trazos
sinxelos, armoniosos, alegres, con moita luz e fáciles de entender.
Durante a súa etapa en Venezuela expón a nivel persoal en distintas
galerías e centros culturais e en 1990 regresa coa súa familia a
Galicia, onde se fai socio do colectivo ALTERARTE, expoñendo de
forma colectiva e individual por varias cidades de España e Portugal.
A meirande parte das súas obras pertencen a coleccións particulares.
