O recoñecemento da figura da muller galega segue a ser unha tarefa pendente na sociedade, xa que a pesares de levar presente ao longo de toda a historia en Galicia, son poucas as veces nas que se puxo en valor a súa importancia. Co obxectivo de cambiar esta realidade, Promove Consultoría e Formación SLNE pon en marcha a II Edición do Concurso Ilustradas, un proxecto artístico que integra a aprendizaxe técnica e posta en valor das mulleres sobre as que investigar para coñecer e recoñecer o seu legado, e do que formará parte o IES Barraña (Boiro). A iniciativa tamén vén da man da Deputación.
O certame desenvolverase en colaboración con nove centros educativos da provincia da Coruña, entre eles o IES Barraña, onde o alumnado poderá participar no concurso. Deste xeito, os participantes poderán optar a que a súa obra sexa unha das seis seleccionadas para formar parte do II Catálogo Ilustradas no que se recollerán as ilustracións das mulleres galegas importantes, pero en moitos casos descoñecidas porque non tiveron o recoñecemento que merecían.
Esta iniciativa dará a oportunidade a máis de 300 alumnos e alumnas dos centros educativos da provincia da Coruña a mostrar o seu talento nas artes plásticas e a ilustración. O prazo do concurso remata o vindeiro 8 de marzo, data na que se realizará a selección das seis persoas e ilustracións premiadas do concurso, así como o resto de obras que formarán parte do Catálogo. O mes de abril acollerá, en principio e dependendo da evolución da COVID-19, o acto de entrega de premios, así como a presentación do II Catálogo Ilustradas.
