O Concello de Rianxo celebra este mércores 24 de febreiro o Día de Rosalía de Castro, recollendo os seus poemas musicados nunha lista de reprodución do Youtube.
Todos os anos o Concello realiza a súa homenaxe publicamente nas rúas e prazas da localidade, pero este ano por mor da COVID – 19, non poderase levarse a cabo.
Na listaxe de reprodución de vídeos de Youtube participarán máis de 40 artistas de estilos musicais diferentes. Entre eles destacan persoeiros como Amancio Praga ou Aida Saco e grupos de rock, rap, trap e jazz.
Doutra banda, o Concello de Rianxo e o Equipo de Dinamización Lingüística do IES Félix Muriel traballarán na elaboración dun caderno de recompilación onde se publicarán textos de Rosalía de Castro. O alumnado e o profesorado encargarase de difundilos a través da lectura na casa. Ademais, o Instituto Rianxeiro e o Servizo de Normalización Lingüística do Concello organizarán un programa dentro do ciclo Camiñando entre mulleres, no que darán visibilidade ao traballo das mulleres que escriben en lingua galega. Desta forma, o alumnado poderá desfrutar dunha conferencia virtual coa profesora da Universidade de Barcelona María Xesús Lama, premio nacional de ensaio polo estudo Rosalía de Castro; cantos de independencia e liberdade.
Con todo, faranse conmemoracións por todo o país para lembrar a existencia de Rosalía. De feito, numerosas asociacións e entidades do ensino celebrarán este Día. Destacan por exemplo a Fundación Casa Rosalía de Castro, que pretende animar a todo o mundo a cociñar o caldo da escritora.Final del formulario
