O Partido Nacionalista de Ribeira denunciou o que considera “unha mala conservación das beirarrúas da localidade”, que están a ocasionar “numerosas caídas”, por mor do estado no que se atopan lousas e baldosas, “en contornas como por exemplo o parque García Bayón, a praza da Concordia ou a rúa peonil de Galiza”.
O voceiro do BNG, Xosé Vázquez Cobas, sinala que “están a recibir moitas queixas polas múltiples caídas e que hai que arranxalas para evitar danos persoais”. Ademais, apuntou que “non é razoábel ter tantas rúas e espazos do municipio con lousas ás que lles faltan anacos ou están tronzadas e levantadas, pois é un perigo para calquera persoa e supón un perigo adicional para as persoas maiores”.
Dende o Bloque consideran que “é hora de poñer en marcha os sistemas de control por semáforos nas rúas peonís, así evitaríase o tránsito de vehículos non autorizados”. Os nacionalistas lembran que “este sistema foi instalado fai anos e nunca estivo en funcionamento”. Tamén recordan que “se poderían acelerar as obras de substitución de firme no parque García Bayón, xa que agora están as restricións de apertura de negocios”.
