A agrupación Boiro Novo anunciou este mércores a súa intención de votar a favor do Plan de Obras e Servizos (actual Plan Único), logo de que o Goberno local aceptase incluír a substitución dos semáforos da avenida da Constitución co cruce da avenida de Barraña por unha rotonda. Boiro Novo lembrou que foi “a única forza política que incluíu esta proposta no seu programa electoral, que ademais foi negociada co actual Executivo local no pacto de investidura dentro do plan de mobilidade sustentábel acordado naquel momento entre as dúas forzas políticas”.
A agrupación, con todo, recorda que ten un programa máis amplo en materia de sustentabilidade e optimización da mobilidade, por exemplo unha proposta para a creación dunha alternativa viaria ao transporte pesado que evite que este tipo de vehículos de grandes dimensións teña que cruzar o centro urbano. Ao fío disto, Boiro Novo láiase de que “non se aproveite o borrador dos orzamentos para incluír algunha partida que a contemplase”. E engaden: “Como entendemos que ambas actuacións deben ir obrigatoriamente da man, dende a nosa asemblea emendaremos a proposta de orzamentos do Goberno para que inclúa necesariamente esta iniciativa”.
