Os socialistas de Ribeira achegaron este martes un rogo para ser tratado pola Corporación municipal relativo ao grave estado de deterioro no que se atopa a rúa do Porto, en Aguiño, á altura da Canteira e camiño de Punta do Laño, un problema de accesibilidade e estético que se estende a boa parte dos accesos á Covasa dende este punto e á contorna cada vez máis degradada da antiga fábrica Demarsa.
Segundo fai saber o grupo local do PSOE, o pavimento asfáltico deste treito da rúa do Porto ten graves deficiencias, un mal estado que se debe sobre todo “ao aporte áridos e terras de escorrentías que proveñen da vía transversal, zona das chabolas; e tamén ao deterioro do firme polo paso do tempo, e ao escaso drenaxe a altura da parcela 18, o que fai que empoce a auga, e se degrade o pavimento asfáltico na unión co formigón da rúa do Porto”, explica a agrupación, engadindo que este estado de cousas provoca molestias e danos nos vehículos que circulan pola zona, “debido ás fochancas producidas na perda bituminosa e os montículos de áridos”.
En virtude de todo isto, o Grupo Municipal Socialista solicita a limpeza dos áridos procedentes da escorrentía, e se proceda á reparación das fochas da calzada nos puntos degradados, ou a unha nova pavimentación deste tramo de vía pública, para permitir o paso sen dificultades, tanto para persoas como para vehículos.
