O Concello de Boiro celebrou na mañá deste luns 18 unha nova sesión semanal da Comisión de Seguimento da Evolución da COVID-19, co fin de determinar novamente a evolución da pandemia do municipio e facer unha análise das necesidades que xorden e das medidas a aplicar nos vindeiros días para seguir freando a incidencia do coronavirus. Amais, déronse a coñecer as actuacións policiais desenvolvidas para garantir o cumprimento das disposicións (houbo sete denuncias).
Ademais das restricións determinadas polas autoridades sanitarias, o Concello mantén canceladas as actividades culturais e deportivas, así como pechados os parques infantís e instalacións municipais. So se permite o uso de instalacións deportivas ao aire libre para a práctica de deporte federado e previa notificación ao departamento de deportes.
Amais, na comisión fíxose saber que os operarios de Protección Civil realizan diariamente fumigacións manuais polos núcleos máis concorridos do municipio e, de xeito puntual, baldeos. Tamén realizan o servizo de recollida de lixo a domicilios illados por positivo en COVID-19 derivados dende o departamento de servizos sociais.
Durante a fin de semana efectuáronse un total de 7 denuncias por incumprir as restricións marcadas polas autoridades sanitarias para facer fronte á situación epidemiolóxica. Dúas delas foron polo uso indebido da máscara de protección, unha por incumprir o peche perimetral e catro por fumar na rúa sen gardar a distancia de seguridade.
O Concello de Boiro insiste na necesidade de cumprir coas medidas de seguridade e protección xerais para que o número de contaxios siga en descenso.
