O Concello de Ribeira informa de que vén de emprender unha actuación dirixida a rexenerar medioambiental e paisaxisticamente o monte de Santo Alberte, e fíxoo repoboando unha parcela situada na súa contorna con especies arbóreas autóctonas.
En concreto, e “co ánimo de favorecer a biodiversidade nesta contorna”, plantáronse un cento de carballos con alturas que oscilan entre os 50 centímetros e o metro e medio nunha parcela próxima á capela de San Alberte. As árbores foron facilitadas pola Consellería de Medio Ambiente, Territorio e Vivenda da Xunta de Galicia.
A actuación incluíu tamén como traballos previos o acondicionamento do terreo (mediante a roza mecanizada do mesmo) e a apertura dos buratos necesarios para efectuar a plantación.
