Estes días a xente da nosa comarca está a encher as redes de audiovisuais con mensaxes de resistencia e reivindicación do noso, poñendo o foco na defensa de dous dos sectores que máis están a sufrir os embates da crise e da pandemia: o comercio e a hostalería. Un dos vídeos que máis está dando que falar é o que lanzou a comunidade de estudantes do segundo curso do Grao Superior de Xestión de Vendas e Espazos Comerciais do Colexio María Assumpta de Noia, que quixeron achegar o seu gran de area e apoiar os establecementos locais cun emotivo, coidado e comprometido vídeo que se acompaña dunha mensaxe clara e contundente, que cómpre non esquecer: O pequeno comercio fainos grandes.
O vídeo, malia ter sido lanzado este martes, xa foi obxecto de arredor de 2.300 reproducións a primeira hora deste mércores 23, o que dá unha idea clara da repercusión que está a ter.
