O Concello de Boiro, en resposta á solicitude efectuada á Sanidade para a realización dun cribado masivo que detectase posíbeis casos asintomáticos e frease o espallamento da COVID-19 no termo municipal, acolle dende hoxe un seguimento exhaustivo de contaxios no sector da hostalería. En concreto, a Consellería de Sanidade comezou este venres a convocar ao persoal traballador dos establecementos do sector en Boiro para facer un cribado masivo de probas PCR.
O Concello de Boiro fixo a solicitude das probas á Consellería de Sanidade o pasado 23 de novembro, cando o municipio chegou ao nivel 3 de alerta. As autoridades sanitarias comunicaron na tarde deste xoves ao Concello a intención de comezar o cribado masivo por todo o persoal traballador do sector da hostalería e detectar posíbeis focos e, se fose preciso, estendelo á poboación xeral.
