O Concello de Boiro vén de recibir un importante apoio orzamentario para desenvolver o seu Plan Integral de Emprego 2020/2021, o programa Boiro Emprega, unha iniciativa que irá destinada a mulleres da comarca do Barbanza en situación de desemprego e inscritas como demandantes dun posto de traballo.
O programa Boiro Emprega está destinado este ano exclusivamente a mulleres, en total van participar 100 usuarias en accións formativas para lograr unha saía profesional axeitada ás súas características e obxectivos individuais. Entre os itinerarios que se ofertan están o de turismo, administración e xestión, industria alimentaria de produción e envasado.
Ademais destes módulos específicos, inclúe “formación transversal en dous eixos, para unha correcta inserción laboral e como complemento da oferta formativa dos diferentes itinerarios”, explicou o Concello, engadindo que as usuarias participantes van recibir tamén obradoiros para a mellora de habilidades necesarias para o emprego.
O prazo de inscrición está aberto e as persoas interesadas en participar deben acudir á oficina de emprego e solicitar que lle asignen o código 930, ou contactar directamente co programa Boiro Emprega no enderezo electrónico orientadorapie@boiro.gal ou prospectorpie@boiro.gal ou nos teléfonos de contacto 659 247 963 ou 650 042 409.
