Porto do Son vai acoller este mes, os días 17, 24 e 31 de outubro, un obradoiro creativo de contos sobre igualdade e co-educación, dirixido a impulsar xeitos de xogar e de adquirir coñecemento libre de todo tipo de estereotipos e prexuízos. A actividade, organizada ao abeiro do programa Conto Contigo, celebrarase na ludoteca sonense en horario de 10.00 a 14.00 horas. As inscricións xa se poden facer na aula de xogos a través do teléfono 981 767 589. Trátase dun obradoiro especialmente indicado para nenas e nenos de entre 9 e 12 anos.
O Concello lembra que para garantir as máximas medidas de seguridade achegaranse prazas limitadas. A actividade vén da man da axencia AGADER (Medio Rural da Xunta), a Asociación Deloa e do Goberno local de Porto do Son.
