O ciclo de faladoiros Onde están as mulleres da cultura?, que busca reivindicar a creatividade (e a súa presenza nos medios e nas redes) dende unha óptica feminina, chegará a Muros este venres 9 de outubro. Este venres, polo tanto, celebrarase a primeira sesión da axenda da man de Olga Osorio, directora de cine, Lula Goce, artista visual e Paula Rego, baterista, coa xornalista Belén Regueira en labores de condutora do evento.
O ciclo constará de dúas sesións baseadas nas carreiras de profesionais que traballan en eidos da cultura onde “a muller está infrarrepresentada”, sinala a organización da actividade, que pon como exemplos desta invisibilidade a literatura, as artes plásticas, o teatro, a música ou o audiovisual. Tras unha primeira charla de cada unha das participantes, abrirase un posterior debate común acerca de como están a vivir a súa produción artística no contexto sociosanitario actual.
A segunda sesión, o día 16 de outubro, contará coa presenza da escritora Eli Ríos, a actriz e directora de teatro Iria Pinheiro e a artista plástica muradana Carmen Senande. Marta Gómez, recoñecida xornalista e directora do ZigZag da TVG, será a encargada de conducir o evento.
O programa vén da man do Concello de Muros e a Secretaría Xeral de Política Lingüística, ao abeiro do Fondo Xacobeo 2021.
