Ante unha trintena de persoas tivo lugar na noite de onte a inauguración da nova exposición do Centro Cultural Lustres Rivas que, baixo o título de “Realismo Maquinismo Máxico e a súa vista ao redor”, está composta por unha vintena de óleos de Luis H. Hernández: artista nado en Barcelona e
residente en Salamanca que tivo a ben acudir a un acto que contou
tamén coas intervención do alcalde de Ribeira, Manuel Ruiz, e a
concelleira de Cultura María Sampedro.
Luis Hernández —quen tiña exposto con anterioridade en cidades
como Barcelona, Cáceres, Madrid ou Valladolid— explicou que a
colección comprende unha colección de traballos compostos nos
últimos doce anos e nos que predominan o estilo surrealista, aínda
que non exento de matices costumbristas. Así, mesmo agradeceu a
oportunidade de poder expoñelos en Ribeira e amosou o seu desexo
de que moita xente acuda a visitalos.
Pola súa parte, o alcalde loou a calidade da colección que mesmo foi
refrendada polo pintor surrealista por antonomasia do noso municipio,
como é Manuel Ayaso, presente no acto inaugural. Tamén María
Sampedro significou a impronta manifesta de autores como Salvador
Dalí e avanzou que o autor doará ao Concello unha das súas obras,
aínda en proceso de creación.
A mostra estará aberta ata o 31 de outubro. Pode ser visitada de luns
a venres de 10 a 14 e de 19 a 21 horas e os sábados de 12 a 14 e de
19 a 21 horas. A entrada é gratuíta.
