O PSdG-PSOE de Ribeira vén de comunicar a súa adhesión ás mobilizacións do Día Internacional contra a Explotación Sexual e Trata de Mulleres, Nenas e Nenos, que se celebra este 23 de setembro para visualizar e combater, en palabras dos socialistas ribeirenses, “unha práctica estendida por todo o mundo que manifesta a desigualdade que sofren as mulleres e da súa pobreza na nosa sociedade”. Segundo recordan no seu manifesto, “a trata de mulleres e de nenas con fins de explotación sexual é un dos máis terríbeis negocios do mundo, se non o maior”.
No seu comunicado, o PSOE reflicte datos de Nacións Unidas e da Unión Europea que certifican “que as mulleres e as nenas representan o 71% das vítimas de trata detectadas en todo o mundo e o 80 % das identificadas en Europa occidental”. Amais, denuncian, o 95% delas acaban explotadas para a prostitución.
Os socialistas de Ribeira, por todo o devandito e por outras moitas cifras dramáticas (por exemplo o feito que a pandemia non faga máis que agravar estes grandes problemas), adhírense ao chamamento de Nacións Unidas para que a resposta á COVID-19 e a recuperación posterior a nivel mundial asignen un lugar prioritario á dignidade humana e os dereitos humanos: “Debemos redobrar os esforzos para protexer ás vítimas da trata e evitar que as persoas vulnerábeis sexan explotadas, e tamén queremos recoñecer o traballo de organizacións e colectivos que seguen prestando servizos vitais durante a crise, localizando ás vítimas e axudándoas a ter acceso á xustiza, a saúde e a asistencia e protección sociais, e evitando que se produzan máis actos de abuso e explotación”.
A agrupación fai saber que “as e os socialistas traballaremos para abolir a prostitución e erradicar a trata de seres humanos con fins de explotación sexual, defender a dignidade das mulleres e rematar coas redes e as mafias que se lucran explotando ás mulleres, nenas e nenos”.
Este, sinalan, é o xermolo da Lei integral contra a trata de seres humanos con fins de explotación sexual e contra a prostitución na que leva traballando o Goberno central dende hai uns meses.
