Entre hoxe 31 de agosto e o 4 de setembro vaise desenvolver a primeira edición do Campus de Surf de Porto Son. As sesións, que se van celebrar nas Furnas en horario de 10.00 a 20.00 horas, están dirixidas a nenas e nenos de idades comprendidas entre os 12 e os 18 anos. O campus vén da man da Escola de Surf Arealonga coa colaboración do Concello. Achégase un número limitado de prazas, non só por motivos de seguridade sanitaria, aínda que tamén, senón para garantir unha atención máis personalizada.
No campus traballarán estes días, impartindo formación teórica e práctica (sobre surf e bodyboard, sobre materiais, modalidades, competicións), profesionais deste deporte compartindo coñecementos e trucos cos novos deportistas. As sesións inclúen equipamento, comidas e seguros. Tamén inclúe charlas sobre a necesidade de coidar a natureza e sobre métodos para garantir a seguridade no mar.
