Onte, sábado, o buque Miguel Oliver, da Secretaría General de Pesca, comezou en Vigo a campaña oceanográfica Descarsel 0820 que se vai desenvolver, ata o 9 de setembro, en aguas do caladoiro nacional Cantábrico Noroeste. O obxectivo principal desta campaña é a realización dun estudo das estratexias de redución de descartes e especies non desexadas, así como da selectividade e supervivencia na pesca da plataforma de arrastre.
Galicia oeste e Cantábrico occidental é a área de traballo seleccionada, na que se estudiarán, entre outras cuestións, as curvas de selección das especies e o seu comportamento e a supervivencia dos descartes. Tamén se obterán as relacións tamaño-peso e se caracterizarán de xeito automático mediante o uso de novas tecnoloxías.
A campaña forma parte do proxecto Descarsel, centrado na busca e desenvolvemento tecnolóxico dos dispositivos de pesca máis selectivos para a pesqueira do Cantábrico Noroeste. Trátase de posibilitar ós pescadores o cumprimento da obriga de desembarque establecida na Política Pesqueira Común (PPC) (en vigor dende o 1 de xaneiro de 2019) que obriga a desembarcar todas as capturas realizadas, incluidas as que non teñen ningún interese comercial, que computan na cota aplicable ó barco.
