20190724. O Club Náutico de Boiro-Marina Cabo de Cruz acolleu hoxe a presentación da VI Bandeira Concello de Boiro Feminina e a V Bandeira Marina Cabo da Cruz que organiza o Club de Remo Cabo da Cruz.
Ao acto asistiron o alcalde de Boiro, José Ramón Romero; o presidente do Club Náutico Boiro-Marina Cabo de Cruz, Manuel Fajardo Piñeiro; Margarita Hermo, en representación de Jealsa-Rianxeira, patrocinador principal do Club; e o presidente do Club de Remo Cabo de Cruz, Daniel Vázquez.
Estas dúas regatas, enmarcadas na Liga Galega de Traiñeiras, terán lugar o vindeiro sábado, 27 de xullo, no peirao de Cabo da Cruz. Ás 17.30 horas dará comezo a regata da liga feminina, na que compiten 6 tripulacións, e a partir das 18.00 horas, aproximadamente, será cando os 11 equipos masculinos da LGTA entren en liza.
