Este xoves 6 de agosto o Cantón da Leña volve centralizar a vida cultural da Pobra, e faino da man de Mad Compass e a súa obra Os limpabotas, Nino e Mambrú. Segundo lembran dende o Concello, Mad Compass é unha nova compañía que reúne artistas de Italia, Francia e Galicia, “un grupo de creadores que veñen do teatro físico, o circo, a música, a danza e os mundos da máscara e os monicreques”. Os limpabotas é un espectáculo onde a acrobacia, a esgrima, o mimo e a improvisación co público converxen nunha obra de público familiar.
A obra relátanos a historia de dous personaxes que irrompen na cidade buscando ao seu próximo cliente, alguén a quen sacarlle lustre aos zapatos, gabándose de ser os mellores na súa materia e de ser respectados no mundo enteiro.
Trátase dunha obra de público familiar onde temas como o traballo, a relación fraternal e a competición son tratados dende a comedia.
Organiza a Concellaría de Cultura da Pobra do Caramiñal en colaboración coa Rede Cultural da Deputación da Coruña.
