A Xunta de Galicia e o Concello de Ribeira están a organizar estes días un curso creativo sobre técnicas para decorar un dos elementos construtivos máis presentes nas fachadas das casas das nosas vilas: os azulexos. No obradoiro están a participar quince persoas, co que se completou o límite do aforamento fixado (unha disposición coa que se quixo garantir a seguridade sanitaria das persoas asistentes). O curso, que é de balde, desenvólvese no primeiro andar do mercado municipal de Ribeira.
Trátase dunha iniciativa promovida pola Xunta de Galicia en colaboración co Concello e que leva por título Os azulexos na ruta xacobea do mar de Arousa. A acción está impartida polo artista Pablo Barreiro en horario de 10 a 14 horas, tanto hoxe como mañá.
