O Concello da Pobra do Caramiñal retoma este mes de xullo a mostra do artista rianxeiro Che Tembra que tivo que interromper na Casa da Cultura Raquel Fernández Soler por mor da chegada da emerxencia sanitaria e o confinamento. Trátase da exposición En feminino plural, que ficará exposta no dito emprazamento da Pobra durante todo o mes de xullo, en horario de 10.00 a 13.30 horas e de 19.00 a 21.00 h, de luns a venres. Trátase dunha colección de 60 pezas, 40 cadros e 20 composicións florais.
Che Tembra, o nome artístico de Andrés Tembra Redondo, é un comprometido creador da nosa comarca cuxas obras destacan polo uso que fai do ferro nas súas moitas manifestacións, un material que lle serve para mergullarse nas raíces prerromanas do Barbanza e de Galicia. Na exposición que se retoma na Pobra, Tembra combina elementos xurdidos da sua forxa con elementos vexetais pintados: hortensias, camelias e outras especies.
