O Concello de Boiro executa as obras para a mellora de infraestrutura viaria no Parque Empresarial de Espiñeira. O alcalde, José Ramón Romero, e o concelleiro de Urbanismo e Obras, Luis Ruiz, visitaron o lugar para coñecer o desenvolvemento dos traballos.
A actuación, dun importe de 140.629,04 euros, contempla a renovación do asfaltado da vía da Fase I do polígono así como o pintado do firme.
Segundo explicaron, “a vía obxecto deste proxecto constitúe o eixo principal de circulación e acceso ás naves e parcelas do polígono, soportando tráfico frecuente e vehículos pesados que presentaba unha degradación significativa tanto do firme como da sinalización”.
Esta obra dá continuidade ás actuacións de mellora da infraestrutura viaria que se veñen realizando nos últimos anos en pequenos tramos, engadiron, apuntando que “o Parque Empresarial de Espiñeira conta cunha superficie de 324.500 metros cadrados e, na actualidade, conta co 90% das súas parcelas ocupadas por unhas cincuenta industrias”.
Para levar a cabo estas actuacións de mellora o Concello de Boiro recibe da Consellería de Economía e Industria unha subvención por importe de 112.503,23 euros.
