A Asociación Cultural Cofradía da Dorna e Portos de Galicia acadaron un acordo definitivo tras varios días de movementos e conversas entre ambas as partes. O pacto fixa a mudanza da entidade ao espazo cedido para o vindeiro día 15, así como unha rebaixa substancial da débeda inicialmente reclamada á asociación.
Á xuntanza celebrada en Ribeira acudiron Juan Sanmartín, director de Portos de Galicia, xunto con técnicos e gardamuelle; María Sampedro, alcaldesa da localidade; Fernando Abraldes, concelleiro de Mar; e os representantes da Cofradía da Dorna: o presidente Álex Nespereira, a vicepresidenta Sonia Gude e o tesoureiro da entidade.
Claves do acordo acadado:
- Data do traslado: A asociación comprometeuse formalmente a mudarse ás novas dependencias o vindeiro 15 deste mes, facilitando deste xeito a entrada do novo concesionario á nave de redes.
- Acondicionamento do espazo: Portos de Galicia levará a cabo obras e intervencións menores nos vindeiros días para reparar as deficiencias nos subministros de auga e luz que presenta a nova sede.
- Axuste da débeda: O director do ente portuario fixo entrega dun xustificante que cancela a contía de 17.000 euros reclamada nun principio e confirma o importe corrixido definitivo en 2.000 euros.
A vicepresidenta da entidade, Sonia Gude, explicou que a asociación sempre tivo a disposición de marchar sen entorpecer o labor de terceiros nin prexudicar aos redeiros, mais precisaban dun prazo razoable para organizar a mudanza con recursos propios. Dende a Cofradía da Dorna amosáronse satisfeitos cos resultados acadados e confiaron en que os compromisos asinados «se traduzan en feitos» sen que se repita unha nova etapa de silencio administrativo.
