O PSdeG-PSOE de Lousame vén de rexistrar no Concello unha proposta de “actuacións prioritarias” para financiar a través do próximo POS+ Adicional da Deputación da Coruña. Os socialistas reclaman ao Goberno municipal que “aproveite estes fondos provinciais para atender as necesidades máis urxentes das distintas parroquias e mellorar os servizos públicos”.
A proposta céntrase en tres ámbitos fundamentais: a mellora do saneamento, a pavimentación da rede viaria municipal e a conservación dos equipamentos comunitarios. O PSdeG-PSOE considera que “estas actuacións son necesarias para mellorar a calidade de vida da veciñanza e garantir unha distribución equilibrada dos investimentos entre os distintos núcleos de poboación”.
En materia de saneamento, os socialistas propoñen executar as redes da Silva, Arribas, Cabalariza, Sabugueiro, Comparade, Maxide e Outeiro, así como completar as obras pendentes na Filgueira.
No ámbito viario, solicitan rematar a pavimentación de Berrimes, actuar nas estradas de Lesende a Vilacoba, de Vilacoba a Mirón, de Arxellas a Guiende e da Igrexa de Tállara a Guiende, ademais de acometer melloras nos núcleos de Servia, Quintáns de Béxeres e Mirón.
Entre as actuacións propostas para os equipamentos públicos destacan a construción dunha cuberta no patio do Punto de Atención á Infancia (PAI) e a reparación do ascensor do club de xubilados, dúas intervencións que os socialistas consideran importantes para mellorar as condicións de uso destas instalacións.
Desde o PSOE de Lousame subliñan que “o POS+ Adicional representa unha oportunidade para dar resposta a necesidades que levan tempo sendo demandadas pola veciñanza e insisten na importancia de priorizar os investimentos en servizos básicos e infraestruturas municipais”.
Por todo isto, os socialistas solicitan formalmente ao Goberno local que “incorpore estas propostas á planificación das actuacións que se financiarán con cargo ao POS+ Adicional da Deputación da Coruña, garantindo que os fondos provinciais se destinen a melloras necesarias para o conxunto do municipio”.
