A comunidade quedará nunha situación intermedia con alternancia de nubes e claros, chuvascos ocasionais no norte e temperaturas sen cambios significativos.
Tras o episodio adverso que mantivo en alerta o litoral galego, a comunidade atoparase este venres nunha situación meteorolóxica de transición, situada a medio camiño entre a influencia das altas e das baixas presións. Este escenario propiciará unha xornada moito máis apracíbel, caracterizada pola alternancia de nubes e claros na maior parte do territorio.
As precipitacións quedarán reducidas a chuvascos illados e de carácter ocasional, localizados principalmente nas comarcas do norte e noroeste de Galicia. Ao longo da xornada, estas choivas residuais tenderán a remitir progresivamente a medida que avance a tarde.
No referente aos termómetros, as temperaturas non experimentarán variacións significativas en comparación cos días anteriores, mantendo rexistros habituais para a época. Pola súa banda, o vento soprará de compoñente noroeste con carácter frouxo de maneira xeralizada polo interior, mentres que na franxa costeira deixará refachos de intensidade moderada.
O noso mar: Vento do norte á mañá e á tarde e do nordés á noite, forza 2 a 3. Mar ovellado. Visibilidade boa. Mar de fondo do noroeste, con ondas de 4 a 5 metros á mañá e á tarde e 3 a 4 metros á noite.
