O deputado Carlos López Font reclama no Parlamento axudas extraordinarias para o marisqueo e un plan de choque con fondos específicos nos orzamentos autonómicos.
O grupo parlamentario do PSdeG cargou con dureza contra a política da Xunta de Galicia en materia de marisqueo. O deputado socialista Carlos López Font denunciou hoxe en comisión parlamentaria que o peche dos principais bancos da ría de Arousa —entre os que citou Cabío, O Bohído e Os Lombos do Ulla— realízase sen actuar «de maneira decidida» sobre as causas de fondo que orixinan o seu deterioro. Segundo Font, clausurar estas zonas sen medidas estruturais «non é unha política de recuperación», senón limitarse a «agardar que a natureza resolva soa o que a Administración ten a obriga de afrontar».
O representante socialista advertiu de que esta inacción deixa desprotexidos aos profesionais do sector, facendo que «mariscadoras e mariscadores paguen as consecuencias» ao depender directamente da produtividade desas áreas. Ante este escenario, López Font defendeu a urxencia de revisar os requisitos de acceso ás axudas por paralización da actividade, poñendo o foco na exixencia actual de 120 días de traballo previo, unha barreira que deixa fóra das compensacións a moitos traballadores que non puideron acadar ese cómputo mínimo. Para os supostos non cubertos polos fondos europeos Fempa, solicitou que o Goberno galego habilite mecanismos complementarios con recursos propios.
A iniciativa presentada polo PSdeG inclúe tamén aos profesionais a flote que non se poden acoller ao cesamento de actividade ordinario. Para este colectivo reclamou unha coordinación urxente entre as distintas administracións e a posta en marcha dun programa extraordinario de axudas compensatorias específico para os bancos afectados, con cobertura vixente entre outubro deste ano e marzo de 2027.
Para alén das medidas paliativas imediatas, o deputado socialista demandou consignacións específicas nos orzamentos da Comunidade para artellar un auténtico plan de choque dirixido á recuperación ambiental, produtiva e socioeconómica da ría de Arousa. A proposta contempla a realización dun diagnóstico científico rigoroso, tarefas de rexeneración dos fondos e apoio financeiro continuado, todo elo fiscalizado a través dunha mesa de seguimento integrada polo sector e as institucións competentes.
Font concluíu a súa intervención lembrando que a crise da ría «xa non se pode abordar coma unha situación excepcional que se resolve pechando os bancos uns meses», senón coma un conflito estrutural de calado económico, ambiental e social. «O sector non pode seguir asumindo en solitario o custo dunha crise con múltiples causas. A ría de Arousa non pode esperar outro ano máis», sentenciou.
