O Museo Valle-Inclán da Pobra do Caramiñal continúa ao longo da segunda quincena de outubro coa programación da vixésimo oitava edición das Xornadas de Homenaxe a Valle-Inclán, achegando diversas propostas culturais abertas á veciñanza e aos centros educativos.
A actividade retomarase o mércores 21 de outubro ás 20:00 h no Centro de Estudos do Museo Valle-Inclán cunha conferencia divulgativa a cargo de Juan Manuel Monterroso, catedrático de Historia da Arte da USC, baixo o título «…Pazo es. Una poética del espacio aplicada a la arquitectura pacega a través de la literatura».
A fin de semana concentrará varias citas destacadas:
- Sábado 24 de outubro: Ás 12:30 h presentarase no Centro de Estudos do Museo o facsímile da obra «Sonata de otoño» de Ramón del Valle-Inclán, editado por Alvarellos e con prólogo de Xaquín del Valle-Inclán Alsina. Xa pola noite, ás 20:00 h, o Teatro Elma acollerá a proxección da película «Tirano Banderas» (1993), dirixida por José Luís García Sánchez.
- Domingo 25 de outubro: Ás 20:00 h no Teatro Elma, a compañía TEP – Teatro En Punto porá en escena a peza «Josefina máis eu», con dramaturxia a partir de Margarita Nelken e Carmen de Burgos baixo a dirección de Gloria Rico Galán.
O público escolar terá protagonismo a semana seguinte coas funcións de «Tirano Banderas» a cargo de Teatro Cachirulo, con monicreques de Carmen Domech e dirección de Jorge Rey. As sesións terán lugar o martes 27 ás 11:30 h no CEP Salustiano Rey Eiras e o mércores 28 á mesma hora no CEP Pilar Maestú Sierra.
O broche final chegará a finais de mes:
- Venres 30 de outubro: Conmemoración do nacemento do escritor. Dende as 12:30 h haberá unha ruada de música tradicional co grupo Caraveiros por prazas e rúas da localidade (Praza de Galicia, Alameda Valle-Inclán, Mercado Municipal, Praza Fonte dos Catro Canos, Praza García Martí e Cantón da Leña), seguida ás 13:00 h da tradicional ofrenda cívica ante o monumento ao autor no Cantón da Leña.
- Sábado 31 de outubro: Ás 20:00 h no Teatro Elma pecharanse os actos co espectáculo «Retablo do esperpento» de Noitebras Teatro, adaptación conxunta de «Ligazón» e «A rosa de papel».
