O sospeitoso, que viaxaba coa muller respecto da cal tiña unha orde de afastamento de 500 metros, fuxiu ao ser requirido polos axentes na praia de Cabío
Axentes da Policía Local da Pobra do Caramiñal detiveron esta mañá un home como presunto autor dun delito de quebrantamento de condena, tras ser sorprendido xunto á muller sobre a que pesa unha medida xudicial de protección que lle prohibe achegarse a menos de 500 metros dela.
O suceso tivo lugar arredor das 09:00 horas na contorna de Cabío, cando unha patrulla detectou un vehículo sospeitoso e procedeu á identificación dos seus dous ocupantes. Ao verificar os datos a través das bases policiais, os axentes comprobaron que o condutor tiña en vigor a orde de afastamento. Nese instante, o implicado arrancou o automóbil para eludir a acción policial.
Ao ratificar que a muller que ía de copiloto era a persoa protexida, a patrulla activou as sereas e os prioritarios para ordenarlle que detivese a marcha. O home fixo caso omiso e iniciou unha fuxida que continuou polas estradas da comarca en dirección a Palmeira, no termo municipal de Ribeira. A fuxida rematou nesa localidade barbancesa cando o fuxitivo se meteu nunha rúa sen saída pechada por mor dunhas obras, momento no que os policías puideron interceptalo e proceder ao seu arresto.
Durante a intervención constatouse que o dispositivo telemático de control non emitira o sinal de alerta habitual porque a propia vítima o retirara. A muller solicitara con anterioridade a revogación da orde de protección, pero a instancia xudicial rexeitara a petición e mantiña vixente a medida cautelar.
O detido foi trasladado ás dependencias da Garda Civil, que se fixo cargo da instrución das dilixencias oportunas antes da súa posta a disposición do xulgado de garda.
