Desde Amnistía Internacional e algúns medios de comunicación están a denunciarse varios casos de agresións, vexacións e torturas, por parte dun grupo de militares españois, cara a algúns migrantes africanos chegados á cidade autónoma de Ceuta, algúns deles menores de idade.
Funcionarios públicos españois violando os Dereitos Humanos, atacando a persoas vulnerables e indefensas, é algo vergoñoso e denigrante que ten que ser perseguido e sancionado debidamente. Non pode ser que nun país democrático e cun Estado de Dereito sexan aplaudidas este tipo de prácticas inhumanas.
Son evidentes os casos de xenofobia e racismo por parte de moito sectores da poboación que se puxeron de manifesto na crise humanitaria de Ceuta, ante a presenza de miles de migrantes pobres e vulnerables en busca de oportunidades e dunha vida mellor. Explotamos as riquezas naturais e o sistema produtivo nos seus países de orixe e logo sorpréndenos que emigren en busca de traballo.
