- As obras, cun investimento estimado superior aos 6,1 millóns de euros, arrancarán en 2027 tras a redacción do plan técnico.
- As empresas interesadas teñen de prazo ata o vindeiro 19 de novembro para presentar as súas ofertas.
A Xunta de Galicia deu este xoves o primeiro paso para a transformación sostible do Hospital público de Barbanza coa publicación, no Portal de Contratos Públicos de Galicia, da licitación do proxecto básico e de execución, así como da dirección das futuras obras de eficiencia enerxética, por un importe de 403.272 euros.
A actuación responde ás conclusións dunha auditoría técnica previa realizada polo Servizo Galego de Saúde (Sergas), na que se detectaron diversas marxes de mellora nas instalacións actuais. O obxectivo central é acadar unha notable diminución no consumo de enerxía e, ao mesmo tempo, ofrecer uns espazos máis confortables tanto para o cadro de persoal coma para os doentes e usuarios do centro.
O proxecto abarcará unha intervención integral na envolvente térmica do inmoble, coa substitución dos muros cortina, a renovación integral de fachadas, carpinterías e vidros, xunto co illamento da cuberta. Así mesmo, prevese a modernización dos sistemas de climatización e arrefriamento coa substitución dos equipos actuais, ademais da implantación de tecnoloxía LED en toda a iluminación.
A redacción técnica do proxecto contará cun prazo máximo de dous meses a partir da formalización do contrato. Posteriormente, a execución material dos traballos está fixada para comezar ao longo de 2027, cun investimento global que superará os 6,1 millóns de euros. As compañías do sector poderán remitir as súas propostas para este concurso ata o vindeiro 19 de novembro.
