O alumnado do Obradoiro de Emprego Noia-Outes-Lousame pon a punto os espazos de lecer de Noia. Este xoves 8 de outubro realizaron traballos de mantemento no paseo marítimo. A vindeira semana continuarán estas tarefas en distintos puntos do concello, tamén na contorna de San Lázaro, segundo confirmaron dende o Concello, engadindo que estas actuacións forman parte das prácticas da súa formación no ámbito forestal, combinando a aprendizaxe cun traballo que repercute na conservación e mellora dos espazos que comparte a veciñanza.
Dende o Concello agradeceron ao alumnado e ao equipo docente “o seu esforzo, a súa implicación e o coidado co que están a desenvolver estas tarefas”.
O Obradoiro de Emprego Dual Noia-Outes-Lousame 2026 é unha iniciativa conxunta destes tres concellos, financiada pola Consellería de Emprego, Comercio e Emigración da Xunta de Galicia cun investimento de 522.052 euros. O obxectivo prioritario é formar e contratar a 20 persoas desempregadas durante un período de 9 meses.
