O Museo do Gravado de Artes (Ribeira), en colaboración coa Asociación Cultural Barbantia, van clausurar o vindeiro 25 de xuño o Encontro de Creadores e Creadoras do Barbanza (BarbantiaRte 2020), que vén de celebrar esta tempada a súa sétima edición. Esta exposición colectiva reúne 81 artistas da comarca do Barbanza e ocupa as salas 0 e 1 do Museo do Gravado.
Segundo lembra o Museo, esta exposición é un reflexo da actualidade creativa recente do Barbanza, servindo de encontro a artistas de diferentes xeracións, que apostan por un abano diverso de estilos e formatos (performance, óleo, gravado, fotografía, escultura, esmalte, vídeo-creación) e que proceden de moi distintos emprazamentos creativos (obradoiros consagrados ou acabados de pór en marcha, de artistas naturais da nosa comarca ou residentes dela, a título individual ou a través do traballo de colectivos como AMBAR para persoas con diversidades funcionais, etc).
O Encontro de Creadores e Creadoras do Barbanza clausurará as súas portas o xoves, 25 de xuño, ás 20.30 h no Museo do Gravado. Ese mesmo día presentarase o catálogo da mostra, BarbantiaRte VII.
Debido á redución de aforo polas medidas preventivas contra o COVID-19, cómpre reservar localidade en fundartes@gmail.com ou no tlf.: 981 871 342 (de martes a sábado de 09.00 a 16.00 h).
