A Deputación da Coruña abriu onte o prazo de adhesión dos comercios á segunda edición de MercaNaVila. Os establecementos dos concellos da provincia de menos de 20.000 habitantes poderán inscribirse ata o 20 de outubro a través da plataforma da campaña para participar neste programa de bonos de desconto, dotado con 5 millóns de euros.
A iniciativa, desenvolvida coa colaboración da Federación Galega de Comercio e de Abanca, enmárcase no apoio da Deputación aos pequenos municipios e ao seu tecido comercial. O obxectivo é impulsar as compras de proximidade, reforzar a actividade dos negocios locais e contribuír a manter o emprego e os servizos que ofrecen á veciñanza.
A institución provincial prevé superar amplamente os 1.000 establecementos nesta segunda edición. A través dos bonos para descargar, a campaña “combina o aforro para as persoas consumidoras cun estímulo directo ás vendas dos comercios adheridos”, informou a Deputación, salientando que “trala boa experiencia de 2025 foi renovada a campaña coa previsión de mobilizar arredor de 25 millóns de euros en compras, multiplicando por cinco o investimento público destinado aos bonos”.
Este gasto, engadiu a Deputación, “repercutirá directamente nos negocios participantes e na economía dos municipios de menor poboación”.
Os bonos poderán descargarse a partir do 20 de outubro
A partir do 20 de outubro, as persoas maiores de idade poderán descargar os bonos na web de MercaNaVila e beneficiarse de ata 100 euros en descontos por persoa. As bonificacións aplicaranse directamente no momento da compra e oscilarán entre os 10 e os 30 euros por operación, en función do importe.
Os bonos poderán utilizarse nos establecementos adheridos entre o 20 de outubro e o 20 de novembro de 2026 ou ata o esgotamento do crédito destinado ao programa.
A Federación Galega de Comercio colabora na difusión da iniciativa e na incorporación dos establecementos a través da súa rede, mentres que Abanca participará na operativa dos bonos e das transaccións vinculadas á campaña.
