O Concello de Boiro celebra este domingo 4 de setembro unha nova edición do Día da Bicicleta, unha xornada que ten como obxectivo a convivencia e diversión arredor deste popular vehículo, saudábel e ecolóxico. O alcalde, José Ramón Romero; o concelleiro de Deportes, Marcos Fajardo; o representante de La Voz de Galicia, Ramón Ares; e a vicepresidenta do Club Ciclista Barbanza, Moncha Moledo; presentaron a actividade.
Segundo explicaron percorrido será como o das edicións pasadas, duns 14 quilómetros e con saída ás 11.00 horas da praza de Galicia. Percorrerá a rúa Principal e rúa peonil para tomar rumbo a Escarabote, onde terá lugar a primeira parada de reagrupamento. Volverá a Boiro para poñer rumbo a Cabo de Cruz percorrendo a avenida de Barraña e o Esteiro ata chegar á Lonxa para facer un segundo reagrupamento.
A ruta seguirá polo Saltiño, Seán e Exipto para tomar regreso a Boiro pola avenida da Constitución ata volver á praza de Galicia. Á chegada terá lugar o sorteo de material deportivo entre todos os inscritos na proba e tamén avituallamento para os participantes.
Explicaron tamén que “non se trata dunha proba deportiva nin competitiva e nela participan nenos e nenas de todas as idades por iso a seguridade é fundamental nun evento como este, no que van participar efectivos da Policía Local, Protección Civil, a Guardia Civil e tamén persoas voluntarias do Club Ciclista Barbanza e Boiromotos que colaborarán durante todo o percorrido”.
O Día da Bici do Concello de Boiro está promovido por La Voz de Galicia e conta co patrocinio de Vegalsa e Jealsa, e conta coa colaboración de Bici Daniel Ríos, Chicolino, Autos R. Outeiral e o Club Ciclista Barbanza.
Para participar é necesario inscribirse previamente no Departamento de Deportes de forma presencial no Edificio das Colonias e praia Xardín ou mediante o enderezo electrónico deportes@boiro.org antes do venres 2 de outubro ás 12.00 horas ou no mesmo día da actividade antes da saída. A actividade está destinada a maiores de 6 anos, posto que non se permite o uso de bicicletas con rodiñas supletorias, e é obrigatorio o uso de casco.
