A presidenta do Museo do Pobo Galego, María Xosé Fernández Cerviño, felicitou esta semana ao Concello de Rianxo polo retorno da escultura da Virxe de Guadalupe do escultor galego Francisco Asorey á praia de Tanxil.
Sinálase na carta recibida polo Concello que “a recuperación da fermosa imaxe de Asorey, creada expresamente para ese emprazamento, constitúe un fito social e cultural ha historia contemporánea de Rianxo”.
E engade: “O Museo espera que este ano, cando a comunidade se congregue para cantar A Rianxeira, a emoción vaia acompañada polo orgullo de recuperar un elemento referencial para o patrimonio do municipio, tan rico e memorábel por múltiples conceptos”.
Como lembraremos, a Virxe de Asorey foi devolvida ao seu emprazamento orixinal (o cantil de Tanxil) este mes de setembro (logo de que fose retirada hai máis de 20 anos do lugar no que se colocara no 1932 por encargo de Ángel Baltar).
O regreso coincidiu coa celebración dun acto público para “festexar o regreso e reposición deste elemento tan representativo do noso patrimonio cultural e da memoria do noso pobo”, segundo indicou o alcalde Julián Bustelo.
Nos últimos tempos a peza foi sometida a diversos traballos dirixidos a restituír o seu esplendor. Entre os elementos que se recuperaron atópanse os seus relevantes motivos decorativos, recuperados no marco da intervención: azulexos vidrados con motivos florais e xeométricos que foron fabricados no seu día na Cerámica Celta de Pontecesures.
Para esta importante actuación, o Concello e o pobo de Rianxo contaron coa colaboración da Consellería de Cultura, Lingua e Xuventude da Xunta de Galicia.
