A Policía Local de Rianxo emitiu un comunicado coincidindo coa celebración das Festas da Guadalupe edición 2026 e no que se achegan unha serie de recomendacións de utilidade para que a cidadanía poida contribuír a unhas celebracións seguras. No comunicado ponse o foco no último día das celebracións, este venres 18, cando será activado un dispositivo dirixido a evitar retencións de tráfico, “dada a elevada afluencia de vehículos ao centro urbano de Rianxo”.
Por este motivo, a Policía Local aconsella aos condutores, especialmente a aqueles que teñan previsto abandonar a vila logo da tradicional cantata de A Rianxeira, “que empreguen os estacionamentos periféricos e os situados nas entradas inmediatas da localidade”.
Así mesmo, os axentes aconsellan aos condutores procedentes da zona de Catoira-Pontevedra que teñan previsto chegar a Rianxo entre as 22.00 e as 2.00 horas, que eviten a autovía AG-11 e accedan ao casco urbano pola estrada DP-3301 (a estrada da costa).
As principais zonas de estacionamento sitúanse en Punta Fincheira, Tanxil e Cemiterio (para os vehículos que accedan pola DP-3301 procedentes de Leiro, Isorna ou Catoira, estes estacionamentos dispoñen de arredor de 1.000 prazas); e para os vehículos que veñan da AG11 e da DP-7202 recoméndanse as zonas de estacionamento das áreas recreativas do Pazo e da Torre, así como os aparcamentos situados en Rianxiño e Arcos Moldes, cunha capacidade de máis de 1.500 vehículos.
Ademais, os axentes recomendan á mocidade que “faga uso do transporte colectivo para os seus desprazamentos”.
Co obxectivo de “garantir a seguridade nas festas”, establecerase un dispositivo especial de tráfico e seguridade cidadá no que participan a Policía Local e a Garda Civil de diferentes especialidades, os Bombeiros, Protección Civil, as ambulancias contratadas polo Concello, o 061 e o punto de información e asistencia Espazo Violeta.
“Animamos á veciñanza e ás persoas visitantes a desfrutar desta noite tan especial e emotiva para os rianxeiros e as rianxeiras, despedindo a nosa Moreniña con responsabilidade, respecto e, sobre todo co sentidiño que sempre caracterizou estas festas”, engaden dende a Policía Local de Rianxo no seu comunicado.
