Casa 47, entidade estatal do Goberno de España, comunicou a apertura da convocatoria para acceder a 96 vivendas en réxime de alugueiro alcanzábel en Galicia e que están situadas en diferentes municipios da provincia da Coruña e en Lugo. Na listaxe de concellos figuran Boiro, con 9 vivendas, e Ribeira, con 22. As vivendas dispoñíbeis contan cunha superficie que vai dos 30 metros cadrados aos 162 metros cadrados e o prezo entre os 350 euros e os 705 euros ao mes, sendo a renda media de 6,24 euros por metro cadrado.
As inscricións realízanse a través de portal.casa47.es ata o 21 setembro. As persoas interesadas teñen á súa disposición unha ficha individual de cada vivenda con fotografías e localización, o prezo mensual de alugueiro e a renda anual da unidade de convivencia (amigos, familia, parella…) que pode acceder á mesma, así como un formulario de solicitude que se poderá cumprimentar en liña.
O Goberno sinala que o contrato poderá durar ata 75 anos, contando cun alugueiro inicial de 14 anos, con prórrogas automáticas de 7 anos a condición de que se manteñan a maior parte das condicións.
Para acceder a estas vivendas as unidades de convivencia non poden posuír unha vivenda en propiedade e deben ter uns ingresos netos conxuntos entre 16.800 e 63.000 euros (é dicir, entre 2 e 7,5 veces o IPREM). As rendas mensuais das vivendas establécense con base no tope fixado pola Comunidade Autónoma e nunca superará o 30% da renda media do municipio.
As vivendas serán asignadas por sorteo ante notario, garantindo a máxima transparencia e igualdade entre todas as persoas solicitantes que cumpran os requisitos.
Unha vez comprobado o cumprimento dos requisitos, asignarase a vivenda de forma provisional e as persoas beneficiarias poderán visitala. Se a vivenda se adapta ás necesidades da unidade de convivencia, asinarase o contrato de alugueiro, procedendo á entrega de chaves.
A solicitude pódea realizar calquera persoa con nacionalidade española ou residencia legal en España e sen límite de idade.
